Ղարաբաղյան հակամարտության գոտի խաղաղապահներ ուղարկելու գաղափարը հիմա չի առաջանում։ Այս մասին «ՌԻԱ Նովոստի»–ին ասել է ԵԱՀԿ–ում ՌԴ ներկայացուցիչ Ալեքսանդր Լուկաշեւիչը։
«Կա դեռեւս 1990-ականներից հաստատված՝ ղարաբաղյան հակամարտության գոտում խաղաղապահ գործողությունների հայեցակարգ։ Բայց դա կարգավորման վերջնական փուլն է, հիմա այդ գաղափարը չի առաջանում, քանի որ չկա կարգավորում։ ԵԱՀԿ քարտուղարության շրջանակներում գործում է այսպես կոչված բարձր մակարդակի պլանավորման խումբ, որն ադապտացնում է ԵԱՀԿ հովանու ներքո տեսական խաղաղապահ գործողությունների անցկացման սխեման։ Այսինքն՝ դա ԵԱՀԿ–ի համար հստակ ուրվագծված խնդիր է։ Բայց ի՞նչ ուժերով։ Ի՞նչ տեսք է այն ունենալու։ Դեռեւս դա միայն քարտեզի վրա սեւագրություններ են, որոնց բավականին պարբերաբար ծանոթանում են անդամ պետությունները»,– ասել է դիվանագետը։
«Նա (խումբը) աշխատում է ԵԱՀԿ գործող նախագահի անձնական ներկայացուցիչ Կասպշիկի գրասենյակի հետ սերտ համագործակցելով, հաճախ լինում է տեղերում։ Ադապտացիա ասելով՝ նկատի ունեն տեղանքի զննումն ու քարտեզի վրա այդ խաղաղապահ ստորաբաժանումների հնարավոր տեղակայման տարբերակները։ Վերջնական կետը կարգավորման սկզբունքները համաձայնեցնելն է, որից հետո կողմերը պայմանավորվում են խաղաղապահ գործողության տարրերի շուրջ։ Բայց դա շատ հեռավոր հեռանկար է եւ այս պահին դեռ շատ տեսական հարց՝ հաշվի առնելով կարգավորման սկզբունքների շուրջ կողմերի համաձայնության բացակայությունը»,– ասել է Լուկաշեւիչը։
Բացի այդ, նրա խոսքով՝ ԵԱՀԿ–ի համար այդ գաղափարը հսկայական մարտահրավեր կլիներ, քանի որ ԵԱՀԿ–ն երբեք չի զբաղվել խաղաղապահ գործողություններով։