Ռուսաստանը Վրաստանի հետ բանակցություններ է վարում Ռուսաստան մեկնող հայկական բեռնատար մեքենաների համար ճանապարհը բացելու հարցի շուրջ։ Այս մասին հունիսի 30-ին՝ Կառավարության  նիստից հետո, լրագրողներին ասել է ՀՀ տրանսպորտի եւ կապի նախարար Գագիկ Բեգլարյանը։

Նրա խոսքով՝ բանակցությունները վարում է Ռուսաստանը Վրաստանի հետ, որպեսզի գոնե ժամանակավորապես Հարավային Օսիայով անցնող ճանապարհը  հասանելի լինի հայ բեռնափոխադրողների համար։ «Այս դեպքում Հայաստանից շատ քիչ բան է կախված»,– խոստովանել է Բեգլարյանը՝ հավելելով, որ Հարավային Օսիայով անցնող ճանապարհը բավականին լավն է։

Նշենք, որ Ներքին Զարամաղ անցակետով Ռազմաօսական ճանապարհը փակ է 2008-ի զինված հակամարտությունից հետո։ Վերջերս տարերային աղետը շարքից հանել էր Վերին Լարս անցակետով Ռազմավիրական ճանապարհի մի մասը, որի հետեւանքով Հայաստանը զրկվել է Ռուսաստանի հետ ցամաքային ճանապարհից։