Եթե Հայաստանը ավելի որակյալ ճանապարհային ենթակառուցվածք ունենա, ապա իրանցի գործարարները հաճույքով կօգտվեն դեպի Կենտրոնական Եվրոպա ու Սեւ ծով տանող այս տարանցիկ ուղուց : Այս մասին Կառավարության հունիսի 30-ի նիստից հետո լրագրողների հետ զրույցի ժամանակ ասել է Տրանսպորտի ու կապի նախարար Գագիկ Բեգլարյանը:
Նրա խոսքով խնդիրն այն է, որ նախագահի կարգադրությամբ Ագարակ գյուղից սկսվող բետոնապատ ճանապարհը հիմա փոխարինվում է ասֆալտապատով, որպեսզի Ագարան- Սիսիան ճանապարհի այս հատվածը շտապ կարգով պատրաստ լինի: «Սա ամենադժվար հատվածն է, ու դրա շահագործումը թույլ կտա ճանապարհը կրճատել 70 կմ-ով, ինչը ժամանակային կտրվածքով 2.5 ժամ է»: Նախարարը նաեւ նշել է, որ եթե մինչեւ Երասխ ճանապարհը վերանորոգվի, ապա իրանական բեռնափոխադրողները կկարողանան շարունակել ապրանքների փոխադրումը Սեւ ծովի վրացական ափով անցնող երկաթգծով:
