Մասնագիտական պարտականությունները ոչ պատշաճ կատարելու համար 2,5 տարվա ազատազրկման դատապարտված, Գյումրիի բժշկական կենտրոնի բժշկուհի, ռադիոլոգ Նազանի Մալխասյան փաստաբանը վերաքննիչ բողոք է ներկայացրել:
«Առաջին ատյանի կայացրած որոշման հետ համաձան չենք եւ վերաքննիչ բողոք ենք ներկայացրել»- NEWS.am-ի թղթակցի հետ զրույցում ասաց Մալխասյանի պաշտպան Իշխան Վանոյանը:
Վերաքննիչ քրեական դատարանը դեռեւս նիստի օր չի նշանակել:
Նշենք, որ Նազանի Մալխասյանը 30 տարվա բժշկուհի է: Նրան նաեւ երեք տարով զրկել են բժշկությամբ զբաղվելու իրավունքից: Ի դեպ, նա շարունակում է աշխատել հիվանդանոցում:
Հիշեցնենք, որ ըստ մեղադրական եզրակացության՝ ռադիոլոգ Նազանի Մալխասյանն իր մասնագիտական պարտականությունների նկատմամբ անփույթ եւ անբարեխիղճ վերաբերմունքի հետեւանքով այդ պարտականությունները կատարել է ոչ պատշաճ, ինչի հետեւանքով անզգուշությամբ առաջացրել է բուժվող հիվանդ Լեւոն Դարբինյանի մահը:
Նազանի Մալխասյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: Խափանման միջոց է ընտրվել ստորագրություն չհեռանալու մասին:
