ԵԱՀԿ-ն աշխատում է կազմակերպության նախագահի անձնական ներկայացուցչի՝ դեսպան Անջեյ Կասպրշիկի գրասենյակի լիազորություններն ավելացնելու ուղղությամբ: Այս մասին հուլիսի 1-ին ԵԱՀԿ խոհրդարանական վեհաժողովի 25-րդ լիագումար նստաշրջանում հայտնել է կազմակերպությունում նախագահող Գերմանիայի արտգործնախարար Ֆրանկ Վալտեր Շթայնմայերը, փոխանցել է NEWS.am –ի հատուկ թղթակիցը Թբիլիսիից:

Նրա խոսքով, հենց անվտանգության նման ճգնաժամային ժամանակներում են պետք ԵԱՀԿ-ն ու երկխոսության ու համագործակցության ամրապնդման նրա գործիքները:  «Նրանք, ովքեր հանդիպում են փախստականների հետ, հասկանում են, թե որքան ցինիկ է այստեղ սառեցված հակամարտությունների մասին խոսելը: Ես հենց նոր եմ ժամանել Հայաստանից ու Ադրբեջանից: Ղարաբաղյան հակամարտության գոտում եղել է էսկալացիա, որը հանգեցրել է բազմաթիվ զոհերի՝ երկու կողմերից էլ: Խոսքը ավելի քան 20 տարի շարունակվող հակամարտության վերջին կուլմինացիայի մասին է, հակամարտություն, որի պատճառով հարյուր հազարավոր մարդիկ են փախել»,- նշել է Ֆրանկ Վալտեր Շթայնմայերը, լռելով այն մասին, որ ապրիլյան սրման նախաձեռնողը Ադրբեջանն է եղել:

Երբ Գերմանիան, շարունակել է նա, ընդունել է ԵԱՀԿ-ում նախագահությունը, հստակ ձեւակերպել է երկու բաղադրիչ, որոնցից առաջինն այն է, որ երկարատեւ հակամարտությունները միանգամից հնարավոր չէ կարգավորել: «Չափից մեծ է էսկալացիայի վտանգը ղարաբաղյան հակամարտության գոտում: Առհասարակ հակամարտությունները անվտանգության ոլորտի ընդհանուր կարգում խորագույն ճգնաժամի ախտանշաններն են: Մենք ձգտում ենք Ղարաբաղում վերականգնել ամուր հիմքերով կայուն իրավիճակը: Մենք նշում ենք արված աշխատանքային առաջարկները ու ձգտում ենք, որպեսզի կողմերը բարդ բանակցային պայմաններ առաջ չքաշեն»,- շեշտել է Գերմանիայի արտգործնախարարը: Դիվանագետի խոսքով, հիմա բանակցում են միջադեպերի վերահսկման մեխանիզմների շուրջ: «Փոքր բայց համառ քայլերի օգնությամբ մենք ձգտում ենք վերականգնել ավելի ամուր կապ հակամարտության կողմերի միջեւ»,- նշել է Ֆրանկ Վալտեր Շթայնմայերը:

ԵԱՀԿ ում Գերմանիայի նախագահության երկրորդ բաղադրիչը, դիվանագետի խոսքով, վերաբերում է բանակցությունների ձեւաչափերին ու բանավեճի ուղիներին, որպեսզի փաստացի առաջ շարժվեն հակամարտությունների կարգավորման ուղղությամբ: