Թուրքական ոստիկանությունը պարզել է Ռուսաստանի երկու քաղաքացիների ինքնությունը, որոնք իրենց պայթեցրել են Աթաթուրքի անունը կրող Ստամբուլի միջազգային օդանավակայանում: Այս մասին հաղորդում է Anadolu գործակալությունը:
Խոսքը Ռաքիմ Բուլգարովի եւ Վադիմ Օսմանովի մասին է: Երրորդ մահապարտի ինքնությունն առայժմ չի հաստատվել: Ոստիկանությունն Օսմանովի հետքը գտել է այն բանի շնորհիվ, որ բնակարան վարձելիս վերջինը միջնորդին իր անձնագրի տվյալներն է փոխանցել: Բնակարանից ոչ հեռու աղբամանում ոստիկանները համակարգիչ են գտել, որի կոշտ սկավառակը մեխով վնասվել է: Ոստիկանությունը փորձում է վերականգնել դրանում առկա ինֆորմացիան:
Ահաբեկչությանը մասնակցության կասկածանքով ձերբակալված 13 անձանց կալանքի ժամկետը երկարացվել է:
Հիշեցնենք, որ հունիսի 28-ի երեկոյան Ստամբուլի օդանավակայանի մուտքի, ելքի եւ միջազգային տերմինալի կայանատեղիում մահապարտները կրակ են բացել մարդկանց ուղղությամբ եւ պայթուցիկ սարք գործի դրել: Ահաբեկչության զոհ է դարձել 43 մարդ, ավելի քան 200 վիրավոր կա:
