Պարագվայի նախագահ Օրասիո Կարտեսը համերաշխություն է հայտնել Վենեսուելայի ժողովրդի հետ եւ երկրի կառավարությանը մեղադրել է մարդու իրավունքները չհարգելու համար, հայտնում է ՏԱՍՍ-ը:
«Երբ մարդու հիմնական իրավունքները եւ ազատությունները խախտվում են, ինչպես դա տեղի է ունենում Վենեսուելայում, մենք չենք կարող լռել», - պետության ղեկավարի խոսքերն է մեջբերում EFE գործակալությունը: Միաժամանակ Կարտեսն ընդգծել է, որ Պարագվայը հավատարիմ է այլ երկրների ներքին գործերին չմիջամտելու սկզբունքին:
Չորեքշաբթի Պարագվայի արտգործնախարար Էլադիո Լոիսագան հայտնել է, որ հանրապետությունը դեմ է հանդես գալիս Հարավամերիկյան ընդհանուր շուկայում (ՄԵՐԿՕՍՈՒՐ) նախագահության փոխանցմանը Վենեսուելային երկրում ստեղծված իրավիճակի պատճառով: Արտգործնախարարի խոսքով, Ուրուգվայը եւ Արգենտինան հուլիսին դաշինքի արտգործնախարարների ներկայությամբ արարողություն կատարելու մասին որոշում են կայացրել, դա չհամաձայնեցնելով Բրազիլիայի եւ Պարագվայի իշխանությունների հետ:
ՄԵՐԿՕՍՈՒՐ-ի մեջ են մտնում Արգենտինան, Բրազիլիան, Վենեսուելան, Պարագվայը եւ Ուրուգվայը, միացման փուլում է Բոլիվիան, ասոցացված անդամներ են հանդիսանում Չիլին, Կոլումբիան, Էկվադորը եւ Պերուն: Դեկտեմբերին դաշինքում նախագահությունը Պարագվայից անցել էր Ուրուգվային: