Զբոսաշրջիկների հոսքը Ռուսաստանից, որի հետ Անկարան սկսել է երկխոսություն վարել հարաբերությունների կարգավորման համար, սկսել է աճել: Այս մասին հայտնել է Թուրքիայի վարչապետ Բինալի Յըլդըրըմը, հայտնում է «ՌԻԱ Նովոստին»:
Նրա խոսքով, Ռուսաստանի ու Իսրայելի հետ հարաբերությունների կարգավորման ուղղությամբ պաշտոնական Անկարայի քաղաքականությունը սկսել է դրական արդյունքներ տալ: «Մենք վերադառնում ենք Ռուսաստանի հետ նախկին հարաբերություններին: Զբոսաշրջային ոլորտում մենք բախվել ենք լուրջ ճգնաժամի, Ռուսաստանը չեղարկել է սահմանափակումները, ռուս զբոսաշրջիկները արդեն սկսել են գալ ու զբոսաշրջային հոսքը ավելանալու է: Մենք շարունակում ենք քայլեր զարգացնել զբոսաշրջության զարգացման ուղղությամբ ու հույս ունենք նախկին ցուցանիշներին վերադառնալ: Միաժամանակ սկսվել են առաջխաղացումներ գյուղատնտեսական ոլորտում: Մենք շարունակում ենք հարաբերությունների կարգավորումը բոլոր ուղղություններով»: