Թուրքիայում ռազմական հեղաշրջման փորձը կարող է ազդել ԱՄՆ-ի քաղաքականության վրա: Այս մասին գրում է The Wall Street Journal-ը:
Նշվում է, որ Հիզմեթ շարժման գաղափարախոս Ֆեթուլլահ Գյուլենի պատճառով Վաշինգտոնը կարող է Անկարայի հետ սուր հակամարտության մեջ մտնել: Թուրքիան կարծում է, որ նա կապ ունի ձախողված ռազմական հեղաշրջման կազմակերպման հետ, եւ ԱՄՆ-ից պահանջում է արտահանձնել ընդդիմադիր գործչին, որն իր հերթին հերքում է իրադարձություններին իր մասնակցությունը:
ՆԱՏՕ-ի անդամ, «Իսլամական պետություն» ահաբեկչական խմբավորման դեմ պայքարում ԱՄՆ-ի առանցքային դաշնակից Թուրքիայում «ժողովրդավարության ցանկացած էրոզիան» կբարդացնի առավել կարեւոր խնդիրները, որոնք կանգնած են նախագահի պաշտոնում վերջին ամիսներն անցկացնող Սպիտակ տան ղեկավար Բարաք Օբամայի, ինչպես նաեւ նրա հաջորդի առջեւ:
Ըստ WSJ-ի՝ Թուրքիայի ռազմավարական դիրքն ու արեւմտյան կապերը նրան ԻՊ-ի դեմ պայքարում ԱՄՆ-ի ռազմավարության, ինչպես նաեւ սիրիական հակամարտության եւ միգրացիոն ճգնաժամի կարգավորման անկյունաքարն են դարձրել: Վաշինգտոնը եւս մեկ անմիջական հետաքրքրություն ունի Թուրքիայում՝ Ինջիրլիքի ավիաբազան, որը կենտրոնական տեղ է զբաղեցնում Մերձավոր Արեւելքում ԱՄՆ-ի ռազմավարության մեջ:
Մինչ Մեծ Բրիտանիայում վերջերս անցկացված հանրաքվեն սպառնում է Եվրամիությանը, Թուրքիայում հեղաշրջման փորձը նոր խնդիրներ է ստեղծում ՆԱՏՕ-ի համար՝ «անկայունության անսպասելի բռնկում» ավելացնելով դաշինքի արեւելյան թեւում:
Հոդվածի համաձայն, ձախողված հեղաշրջումը վերջին շրջանի եւս մեկ կարեւոր իրադարձություն դարձավ՝ տարբեր երկրներում ահաբեկչական հարձակումների, իրենց դիրքերը վերականգնելու ուղղությամբ Ռուսաստանի եւ Չինաստանի գործողությունների, Հյուսիսային Կորեայի կողմից «զենք ճոճելու» շարքում: Ըստ պարբերականի՝ այս ամենը տեղի է ունենում մոլորակի թեժ կետերում ԱՄՆ-ի բանակի դերն ընդգծելու՝ Օբամայի ջանքերի ֆոնին, իսկ պոպուլիստական եւ հակագլոբալիստական տրամադրությունները սնում են նախագահական մրցապայքարը, ինչը կարող է աշխարհում Վաշինգտոնի դերի փոփոխությունների հանգեցնել:
Gazeta-ի փոխանցմամբ՝ Թուրքիան ԱՄՆ-ի համար կարեւոր էր որպես կայուն կամուրջ Արեւմուտքի եւ Մերձավոր Արեւելքի միջեւ: Սակայն Օբաման երկկողմ հարաբերություններն իր հաջորդին կփոխանցի բոլորովին այլ տեսքով, քան ստացել էր պաշտոնը ստանձնելիս: Անկարան ահաբեկչության դեմ պայքարում Վաշինգտոնի գործընկերն է, եւ ապագա նախագահը ստիպված կլինի որոշել, թե ինչ մարտավարություն պետք է ընտրի: