ԱՄՆ-ն պատրաստ է թուրք գործընկերների հետ քննարկել Հիզմեթ շարժման գաղափարախոս Ֆեթուլլահ Գյուլենի արտահանձնման մասին պահանջը: Hurriyet-ի փոխանցմամբ՝ այս մասին հայտարարել է Անկարայում ԱՄՆ դեսպան Ջոն Բասսը՝ կտրականապես հերքելով տեղեկություններն այն մասին, որ Վաշինգտոնը մասնակցություն է ունեցել Թուրքիայում հեղաշրջման փորձին:
«Ինչ վերաբերում է Միացյալ Նահանգներում բնակվող անձանց կողմից պետական հեղաշրջման փորձին հնարավոր մասնակցության մասին հարցին, մենք հստակ հասկացրել ենք, որ ԱՄՆ-ն պատրաստ է սատարել Թուրքիայի իշխանություններին հեղաշրջման հետաքննության հարցում: Եթե Թուրքիան որոշի հարցում ներկայացնել ԱՄՆ-ում օրինական կերպով բնակվողների արտահանձնման մասին, այն կքննարկվի արտահանձնման մասին թուրք-ամերիկյան համաձայնագրին համապատասխան:
Ամերիկյան կառավարության ներկայացուցիչները պատրաստ են աշխատել թուրք գործընկերների հետ եւ քննարկել իրավական եւ փաստական անհրաժեշտ ստանդարտները՝ արտահանձնման մասին երկկողմ համաձայնագրի շրջանակում: Ես ընդգծում եմ, որ այդ համաձայնագիրն ու ԱՄՆ-ի օրենքները յուրահատուկ պահանջներ ունեն, որոնք պետք է իրականացվեն՝ կասկածյալին արտահանձնելու համար»,- ամփոփել է դիվանագետը:
