Իրանի խորհրդարանի խոսնակ Ալի Լարիջանին միջուկային համաձայնագրի մասին ՄԱԿ վերջին զեկույցի կապակցությամբ ԱՄՆ–ին սպառնացել է գործարկել ուրանի հարստացման գործարանը, հայտնում է IRNA–ն։
«Անհրաժեշտ է, որ Իրանի միջուկային էներգետիկայի կազմակերպությունը, համաձայն գործող օրենքի, պատրաստի երկրի կարիքներին համապատասխան մակարդակով ուրանի հարստացման գործարանի գործարկման նախագիծը եւ տեղյակ պահի Մեջլիսին»,– մեջբերում է գործակալությունը Լարիջանիի հայտարարությունը, որը քննադատել էր Իրանի միջուկային գործունեության մասին ՄԱԿ զեկույցը։
Լարիջանին նաեւ նշել է, որ ՄԱԿ զեկույցը մի շարք սխալներ է պարունակում։ «Մեջլիսը՝ ՄԱԿ գլխավոր քարտուղարի գործողություններից հիասթափված, նախազգուշացնում է ԱՄՆ կառավարությանը, Սենատին, Ներկայացուցիչների պալատին, որ միջուկային համաձայնագրի դեմ քայլերը հասել են այն կետին, երբ Իրանին ուրիշ ելք չի մնում, քան դիմադրելը»,– ասել է խոսնակը։
