Եթե Թուրքիայի նախագահ Ռեջեփ Թայիփ Էրդողանն այդքան զբաղված չլիներ իր բանակով, կկատաղեր Ավստրալիայում լույս տեսած նոր գրքի պատճառով, որը Հայոց ցեղասպանության մասին անվիճելի փաստեր է պարունակում: Այս մասին գրել է բրիտանացի լրագրող Ռոբերտ Ֆիսկը:
Վիգեն Բաբկենյանի եւ Փիթեր Սթենլիի «Հայաստանը, Ավստրալիան եւ մեծ պատերազմը» գրքում հավաքված են Հայոց ցեղասպանության մասին ավստրալացի ռազմագերիների վկայությունները:
«Թուրքերի համար, որոնք մինչեւ հիմա ժխտում են կանխամտածված ցեղասպանության արշավի ընթացքում հայերի գլխատումը, զանգվածային մահապատիժը, բռնաբարությունները (եւ Սուլթան Էրդողանը նրանցից մեկն է), դժվար կլինի վիճարկել այս վկայությունները»,- գրել է հեղինակը:
Օրինակ՝ թուրքերի կողմից գերեվարված ավստրալական 14-րդ գումարտակի լեյտենանտ Լեսլի Լուսքոմբը պատմել է, որ տխուր պատկերի ականատես է եղել. երկաթուղային կառամատույցում միմյանց սեղմված կանգնած էին կանայք եւ երեխաներ, իսկ մտրակներով զինված թուրք զինվորները նրանց վագոններն էին քշում՝ համակենտրոնացման ճամբարներ քշելու համար:
Եվս երկու ռազմագերիներ պատմել են, թե ինչպես են գյուղում «սպանված հայ կանանց եւ երեխաների այլանդակված մնացորդներով» լի տուն գտել: Ավստրալացի որոշ զինվորականներ նույնիսկ կռվել են թուրք զինվորների հետ, որոնք սպանել են խմբից հետ մնացած հայերին:
Գրքում պատմում են նաեւ հազարավոր հայերի մասին, մեծ մասը՝ կանայք եւ երեխաներ, որոնք սովահար են եղել Դամասկոսից դեպի Հոմս, Համա եւ Հալեպ տանող ճանապարհին:
Բավական մեծ գիրք է, որպեսզի սուլթան Էրդողանը կարողանա ընկղմվել դրանում, երբ ավարտի իր կոտրված երկրու մաքրումները: Բայց ենթադրում եմ, որ նա միշտ կարող է հայտարարել, որ, չնայած ապացույցներին, Օսմանյան կառավարությունը պատասխանատվություն չի կրում հայերի ցեղասպանության համար՝ հիմնավորելով, որ այդ զինվորները, ինչպես նաեւ իր սեփական զինվորականները, պարզապես իրենց ձեռք են վերցրել օրենքը»,- ամփոփել է հեղինակը: