«Հիմնադիր խորհրդարանի» անդամ Կարո Եղնուկյանը կալանավորվեց: Այս մասին NEWS.am-ի թղթակցին ասաց Եղնուկյանի փաստաբան Տիգրան Հայրապետյանը:
«Առանց հիմնավորման Եղնուկյանին կալանավորելու որոշում կայացրեց դատարանը»,- ասաց փաստաբանը:
Կարո Եղնուկյանին այսօր մեղադրանք էր առաջադրվել Քրեական օրենսգրքի 38-218-րդ եւ 38-219-րդ հոդվածներով՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու համար:
Նշենք, որ Կարո Եղնուկյանը ձերբակալվել է հուլիսի 19-ին: Ազգային անվտանգության ծառայությունը խուզարկություն էր իրականացրել Կարո Եղնուկյանի եւ նրա կնոջ մոր բնակարաններում, երկու մեքենաներում, ավտոտնակում, որից հետո Եղնուկյանը բերման էր ենթարկվել եւ ձերբակալվել։
Կարո Եղնուկյանը 1988-ից ԱԻՄ-ի անդամ է, ակտիվ գործունեություն է ծավալել ղարաբաղյան պատերազմի ժամանակ, մեծ ֆինանսավորումներ է իրականացրել: Լինելով ԱՄՆ քաղաքացի, վերջին 10 տարում ընտանիքով վերադարձել ու ապրում է Հայաստանում: