«Լեւոն Տեր-Պետրոսյանը ամոթալի հայտարարություն է արել»։ Այդ մասին Խորենացի փողոցում հայտարարել է ԱԺ պատգամավոր Նիկոլ Փաշինյանը՝ անդրադառնալով ՊՊԾ գնդի գրավման վերաբերյալ առաջին նախագահի հայտարարությանը։
Հիշեցնենք, որ Փաշինյանը երեկ հայտարարել էր,թ ե Խորենացի փողոցում այլեւս անելիք չունի, սակայն այսօր նոր տեսանյութ էր տարածել եւ վերադարձել Խորենացի փողոց։
Փաշինյանը, որը նախկինում Տեր-Պետրոսյանի զինակիցն էր, այժմ նրան մեղադրել է Սերժ Սարգսյանի հետ դաշինք կազմելու մեջ։ «Լեւոն Տեր-Պետրոսյանը դաշինք է կազմել Սերժ Սարգսյանի հետ՝ Ղարաբաղի հարցում, այսպես կոչված մի ծրագիր իրագործելու համար, որը դիվանագիտական շրջանակներում հայտնի է լավրովյան պլան անունով: Դա մի խատառակ լուծում է ՀՀ համար, եւ այդ լուծման համաձայնվելը ամոթալի է ոչ միայն առաջին դեմքերի, այլեւ ՀՀ յուրաքանչյուր քաղաքացու համար», - ասել է Փաշինյանը՝ նշելով, թե բացի աշխարհաքաղաքական, աշխարհահայացքային պատճառներից այստեղ կա եւս մեկ անձնական մոտիվ՝ Տեր-Պետրոսյանն ուզում է օգնել Սերժ Սարգսյանին ազատագրված տարածքները հանձնելու հարցում, որպեսզի ի վերջո կարողանա արձանագրել, որ 96,97 թվականներին ինքը ճիշտ էր ասում:
Փաշինյանը ոգեւորել է հավաքվածներին, հայտարարել, թե չի թույլատրելու, որ կասկածելի վարքով անձինք սադրանքներ անեն, բախումներ հրահրեն: Այդպիսիները, ըստ Փաշինյանի, գործակալներ են։ «Այս շարժման գլխավոր սիմվոլը լինելու է բաց եւ բարձրացված ձեռքեր` ցույց տալու համար, որ մեզ պետք չէ մահակ, քար, մենք ուժեղ ենք մեր մտքով, պատմությամբ, ՀՀ-ով, ԼՂՀ-ով, մեր երեխաների ճակատագրի առաջ մեր պատասխանատվությամբ: Եթե ժողովուրդը որոշի, որ Սերժ Սարգսյանը շարունակելու է թալանել Հայաստանը, ես ենթարկվելու եմ, չեմ կարող խանգարել: Ուժեղ Հայաստանում կուզենա ապրել` ես կօգնեմ»,- ասել է Փաշինյանը:
Ըստ պատգամավորի, ի սկզբանե իր գործողությունները միտված են ապացուցելու, որ «Սասնա ծռերի» տղաները ահաբեկիչ չեն. «Այդ մարդիկ փորձում են շոկային ցնցման միջոցով թարմացնել այն լավատեսությունը, որով հայ ժողովուրդը 1991-ին ձեռք բերեց պետականությունը»,- ասել է նա՝ նշելով, թե Սերժ Սարգսյանին իշխանությունից հեռացնելու ժամկետների պատասխանը պետք է տա ժողովուրդը: Նրա խոսքով, իր նպատակն է, որ «Սասնա ծռերի», փոխոստիկանապետ Վարդան Եղիազարյանի, Երեւանի փոխոստիկանապետ Վալերի Օսիպյանի գլխից մի մազ չպակասի։
Պատգամավորն ընդգծել է, թե պայքարը պետք է խաղաղ լինի, սկսվի Երեւանից, տարածվի մարզերով։
