Թուրքիայի նախագահ Ռեջեփ Թայիփ Էրդողանը հայտարարել է, որ կողմնապահ է համարում՝ երկրում ռազմական հեղաշրջման փորձին ի պատասխան իր ձեռնարկած գործողությունների մասին ԵՄ քննադատությունը: «Նրանք անում են հակասական հայտարարություններ: Նրանք կողմնապահ են ու կշարունակեն կողմնապահ գործել Թուրքիայի հանդեպ»,- ասել է պետության ղեկավարը «Ֆրանս-24» հեռուստաալիքին տված հարցազրույցում:
Էրդողանը նշել է, որ անվտանգության ապահովմանն ուղղված իր ձեռնարկած քայլերը միանգամայն համադրելի են այն քայլերի հետ, որոնք ոչ այդքան վաղուց ձեռնարկել էին արեւմտյան երկրները ահաբեկչությունը կանխելու շրջանակում: Բացի դրանից նախագահը քննադատել է Բրյուսելին, որ չի ցանկանում ավելի ակտիվ աշխատել ԵՄ-ին Թուրքիայի անդամակցության հարցի շուրջ: «Վերջին 53 տարիներին Եվրոպան մեզ ստիպում է սպասել»,- պարզաբանել է նա, հավելելով, որ վերջին տասնամյակներին ԵՄ-ին անդամակցել են որոշ երկրներ, որոնք շատ ավելի քիչ էին համապատասխանում ԵՄ պահանջներին, քան Թուրքիան:
Թուրքիան ԵՄ-ին անդամակցելու ցանկության մասին հայտնել է 1963-ին: 1980-ականներին Անկարան անդամակցության պաշտոնական հայտ է ներկայացրել: Այս հարցով բանակցությունները ԵՄ-ի ու Թուրքիայի միջեւ սկսվել են 2005-ից, սակայն դեռ հեռու են ավարտից:
Հուլիսի 15-ին մի խումբ զինվորականներ փորձել են տապալել Թուրքիայի նախագահին: Ապստամբությունը ճնշվել է, որին հաջորդել է զտումներ երկրի զինված ուժերում: Թուրքիայի իշխանությունները հեղաշրջման կազմակերպման մեջ մեղադրել են քարոզիչ Ֆեթուլահ Գյուլենին, որը ԱՄՆ-ում է բնակվում: