Թուրքիայի նախագահ Ռեջեփ Թայիփ Էրդողանը պատրաստ է վերականգնել երկրում մահապատիժը: Այս մասին նա հայտնել է հարցազրույցում, որը ցուցադրվել է հուլիսի 23-ին «Ֆրանս-24» հեռուստաալիքի եթերում:
«Անհրաժեշտ է հստակ հայտարարել՝ եթե իմ ժողովուրդը, իմ երկիրը միահամուռ պահանջում է վերականգնել մահապատիժը ու եթե ժողովրդի ներկայացուցիչները խորհրդարանում ասեն «այո» այդ պահանջին,, ապա կներե՛ք, ես պարտավոր եմ հարգել այդ պահանջը: Դա է ցանկացած քաղաքական գործչի խնդիրը»,- ասել է Էրդողանը:
«Ժողովրդավարության պայմաններում ինքնիշխան որոշումը ժողովրդին է պատկանում: Դա անվիճարկելի է: Եթե ժողովուրդը պահանջում է, դա կարող է ամեն ինչ փոխել»,- հավելել է նա:
«Մայրցամաքային Եվրոպան չի ցանկանում մահապատժի կիրառում: Բայց այն կիրառվում է թե ԱՄՆ-ում, թե Ռուսաստան-ում եւ Չինաստանում, աշխարհի երկրների մեծ մասում»,- հիշեցրել է Թուրքիայի նախագահը: