Հուլիսի 20-ին Կիեւում սպանված լրագրող Պավել Շերեմետին հուղարկավորել են այսօր՝ հուլիսի 23-ին, Մինսկում, հայտնում է ՌԻԱ Նովոստին»:
Շերեմետին հուղարկավորել են քաղաքի հյուսիսային գերեզմանոցում նրա հոր գերեզմանի մոտ: Լրագրողի հոգեհանգիստը տեղի է ունեցել Ամենայն սրբոց եկեղեցում: Գործընկերները, ընկերներն ու հարազատները լրագրողին վերջին հրաժեշտը տվեցին ծափահարություններով:
Նշում են, որ լրագրողի մարմինը Կիեւից Մինսկ տեղափոխվել է Ուկրաինայի նախագահի մամուլի քարտուղար Սվյատոսլավ Ցեգոլկոյի, պատգամավորներ Մուստաֆա Նայեմի, Սերգեյ Լեշչենկոյի, նաեւ ուկրաինացի լրագրողների ուղեկցությամբ:
Լրագրող Պավել Շերեմետը զոհվել է Կիեւում հուլիսի 20-ին՝ ավտոմեքենայի պայթյունի հետեւանքով: Կիեւի դատախազությունը քրեական գործ է հարուցել «Կանխամտածված սպանություն» հոդվածով: Ավելի ուշ հայտնի է դարձել, որ նրա ավտոմեքենայի տակ պայթուցիկ դնողը կին է եղել: Ուկրաինայի ոստիկանության մամուլի ծառայությունում հայտնել են, որ Պավել Շերեմետի սպանության հիմնական վարկած է դիտարկվում նրա մասնագիտական գործունեությունը: