Երեւանի Խորենացի փողոցում այս պահին իրավիճակը հանդարտ է, մեծ բազմություն է հավաքվել, որը մասնակցում է հանրահավաքին։
NEWS.am-ի թղթակիցը հայտնում է, թե հանրահավաքում ելույթ են ունեցել Ալեք Ենիգոմշյանը, դերասանուհի Թամար Հովհաննիսյանը, «Հայազն» կուսակցության անդամ Արմեն Հովհաննիսյանը, քաղաքագետ Անդրիաս Ղուկասյանը, «Արձագանք» ստուդիայի հիմնադիր Եղիշե Պետրոսյանը, ԱԻՄ նախագահ Պարույր Հայրիկյանը։
Արմեն Հովհաննիսյանը առաջարկեց աշխատանքային խմբեր ստեղծել՝ տեղում տարբեր հարցեր լուծելու համար։ Մասնավորապես, ըստ նրա, հրատապ անհրաժեշտություն է քարոզչական խմբի ստեղծումը, որը փորձի տարբեր հարթակներից օբյեկտիվորեն ներկայացնել ստեղծված իրավիճակը։ Արմեն Հովհաննիսյանը հայտարարեց, որ քաղաքացիների համար շուտով հատուկ անկյուն կբացվի, որտեղ նրանք կարող են ծանոթանալ խորհրդի ստեղծած հռչակագրին ու ստորագրել դրա տակ՝ ի նշան համաձայնության։
Ալեք Ենիգոմշյանը, որը նշեց, որ բանակցությունները շարունակվում են, տեխնիկանան զարգացումներ եղել են, սակայն էական փոփոխություն չկա։
Այսօր նաեւ հայտնի է դարձել, թե է փոխարինելու Արցախի հերոս, ԱԺ պատգամավոր Վիտալի Բալասանյանին «Սասնա ծռերի» եւ իշխանությունների միջեւ բանակցություններում։ Նախաձեռնող խմբի անդամներից մեկը մեր թղթակցին հայտնեց, թե նոր բանակցողը Սիսիանի «Սիսական» ջոկատի հրամանատար Աշոտ Մինասյանն է՝ «Աշոտ Երկաթը»։
Խորենացի փողոցում նաեւ մեծ քանակությամբ ոստիկաններ կան, որոնք արգելափակել են դեպի ՊՊԾ գունդ տանող ճանապարհը։ Այդտեղ է գնվում նաեւ Երեւանի փոխոստիկանապետ, գնդապետ Վալերի Օսիպյանը, որը գրեթե յոթ օր անցկացրել էր պատանդի կարգավիճակում։
Նշենք, որ Օսիպյանն ու ՀՀ փոխոստիկանապետ, գեներալ-մայոր Վարդան Եղիազարյանը վերջին պատանդներն էին, որոնք «Սասնա ծռեր» խումբը ազատ էր արձակել հուլիսի 23-ին։