Հայաստանի ԱԱԾ-ն դիմել է «Սասնա ծռեր» խմբի անդամներին՝ հորդորելով կամովին վայր դնել զենքն ու հանձնվել իշխանություններին եւ նշել, որ դրա համար դեռ ժամանակ կա:
ԱԱԾ գրության մեջ ասվում է.
«2016թ. հուլիսի 17-ից մինչ օրս զինված խմբի կողմից ՀՀ ոստիկանության պարեկապահակային ծառայության գնդի տարածքի զավթման ընթացքում, ըստ այս պահին առկա նախնական տվյալների, կատարվել են առնվազն հետեւյալ հանցանքները.
- վերցվել են պատանդներ (ՀՀ քրեական օրենսգրքի 218 հոդված),
- զավթվել են շենքեր, շինություններ, տրանսպորտի, հաղորդակցության միջոցներ (ՀՀ քրեական օրենսգրքի 219 հոդված),
- ապօրինի կերպով ձեռք է բերվել, պահվել, փոխադրվել եւ կրվել է հրազեն (ՀՀ քրեական օրենսգրքի 235 հոդված)
Այս հանցանքները կատարած անձանց սպասում է մինչեւ 15 տարի ժամկետով ազատազրկում:
Արդեն իսկ կատարված հանցավոր գործողությունների համար անխուսափելիորեն վրա հասնելիք քրեական պատժի տեսակի եւ խստության աստիճանի վրա էապես ազդելու են զինված խմբի յուրաքանչյուր անդամի կատարած գործողությունների բնույթը եւ առաջացրած հետեւանքների ծանրությունը:
Միաժամանակ ՀՀ օրենսդրությամբ նախատեսված հիմքերի եւ պայմանների առկայության դեպքում.
- իր պահանջներից հրաժարված եւ պատանդին կամովին ազատ արձակած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում,
- իր պահանջներից հրաժարված եւ զավթածը կամովին ազատած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում,
- ապօրինի հրազենը կամովին հանձնած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում:
Զինված խմբի անդամներին մեկ անգամ եւս հորդորում ենք դրսեւորել ողջամտություն եւ հաշվի առնելով վերոնշյալ հանգանամքները` կամովին վայր դնել զենքն ու հանձնվել իշխանություններին: Դրա համար դուք դեռ ժամանակ ունեք:
Այս առաջարկն ընդունողները պետք կատարեն հետեւյալ գործողությունները.
1. դուրս գալ անցագրային կետից,
2. զենքը պահել գլխավերեւում եւ թեքվելով աջ, առաջանալ մոտ 50 մետր,
3. շինանյութի խանութի հարակից տարածքում տեղադրված հովանոցների մոտ վայր դնել բոլոր զենքերը,
4. Ճանապարհի կենտրոնական մասով առանձին-առանձին մոտենալ Ոստիկանության ծառայողներին»: