Ամերիկյան պաշտոնաթող գեներալ Ջոն Քեմփբելը ծիծաղելի է անվանել իր հասցեին թուրքական մամուլի մեղադրանքները: Այս մասին գրում է ՏԱՍՍ-ը՝ վկայակոչելով The Wall Street Journal-ը:
Մինչեւ այս տարվա մայիս Աֆղանստանում կոալիցիոն ուժերը ղեկավարած գեներալը հայտարարել է, որ թուրքական Yeni Safak պարբերականում հրապարակված հոդվածը «նույնիսկ պատասխանի արժանի չէ»:
The Wall Street Journal-ը գրում է, որ թուրքական կողմն առաջին էջով նյութ է հրապարակել, որում Քեմփբելին կոչել է «Թուրքիայում ռազմական հեղաշրջման փորձի հետեւում կանգնած անձ»: Հոդվածում մեղադրանքներ կան այն մասին, որ Քեմփբելը, իբր, գաղտնի հանդիպումներ է ունեցել Ինջիրլիք ռազմաբազայում:
«Հեղաշրջումից հետո թուրքական կառավարության որոշ անդամներ եւ Էրդողանին սատարող թերթեր ԱՄՆ-ին մեղադրեցին դավադրությունը գաղտնի սատարելու մեջ»,- գրում է The Wall Street Journal-ը:
