Հուլիսի 26-ի գիշերը ժամը 2-ի սահմանում ոստիկանների կրակոցներից ոտքի վիրավորումներ ստացած «Սասնա Ծռերի» զինված խմբի անդամներ Աշոտ Պետրոսյանին եւ Հովհաննես Հարությունյանին տեղափոխել են ՀՀ ԱՆ «Դատապարտյալների հիվանդանոց»:

Նշենք, որ Աշոտ Պետրոսյանին եւ Հովհաննես Հարությունյանին այսօր մեղադրանք էր առաջադրվել ՀՀ քրեական օրենսգրքի 219-րդ հոդվածի 3-րդ մասով ՝ Շենքեր, շինություններ, տրանսպորտի, հաղորդակցության կամ կապի միջոցներ զավթելը եւ  235-րդ հոդվածով՝  Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:

Ավելի վաղ NEWS.am-ը հայտնել էր, որ ըստ «Սասնա ծռեր» խմբավորման հայտարարության ՝ գիշերը ժամը 2-ի սահմաններում տարածքին հարակից ոստիկանական պատնեշից կրակ են բացել, որի արդյունքում ոտքերից վիրավորվել են «Սասնա Ծռեր» խմբի անդամներ Աշոտ Պետրոսյանը եւ Հովհաննես Հարությունյանը:

Ոստիկանությունն էլ հայտարարել է, որ ժամը 01.00-ի սահմաններում գնդի տարածքից դուրս է եկել ոստիկանության «ՈՒԱԶ» մակնիշի ավտոմեքենան ու շարժվել ոստիկանության Էրեբունու բաժնի ուղղությամբ՝ դեպի արգելապատնեշում կանգնած ոստիկանական շղթան։ Մեքենան ընդհուպ մոտեցել է շղթային, ի պատասխան՝ հնչել են կրակոցներ, որոնց իրավապահները չեն պատասխանել։ Հրաձգության հետեւանքով մեքենայում գտնվող երեք անձանցից երկուսը ոտքերի վնասվածքներ են ստացել եւ նահանջել գնդի տարածք։ Ավելի ուշ, զինված խումբը թույլատրել է Աշոտ Պետրոսյանին ու Հովհաննես Հարությունյանին տեղափոխել հիվանդանոց։