Գերմանիայի կանցլեր Անգելա Մերկելի համար ոսկե դարն ավարտին է մոտեցել, եւ հայտնի չէ՝ նա կկարողանա՞ երկիրը նույն հաջողությամբ կառավարել մութ ժամանակներում, ինչպես նախկինում, փոխանցում է Politico-ն:
Նշվում է, որ վերջին տասնամյակը, որը համընկել է, Մերկելի իշխանության ղեկին լինելուն, Գերմանիայի համար իսկապես ոսկե դար էր: Այսպես, երկիրը հաջողությամբ հաղթահարեց տնտեսական ճգնաժամը, քաղաքականապես դարձավ Եվրոպայում գերակայող ուժ, եւ ընդհանրապես առավել ազատական, տոլերանտ եւ բարեհոգի, ինչը Գերմանիան դարձրեց ապրելու համար գրավիչ երկիր:
Սակայն այսօր այդ առաջընթացը կասկածներ է հարուցում: Հասարակության տրամադրությունները նկատելիորեն փոխվել են այն բանից հետո, երբ երկիր ժամանեցին հարյուր հազարավոր փախստականներ: Զանգվածային միգրացիայի եւ ահաբեկչության վախի ֆոնին տեղի ունեցավ «Գերմանիայի համար այլընտրանք» աջակողմյան կուսակցության վերելքը: Իսկ Մերկելն արդեն ավելի թույլ եւ խոցելի է թվում:
Գերմանիայի տնտեսությունը ցուցադրում է որոշ թուլության նշաններ, նշել է պարբերականը: Մասնավորապես՝ խնդիրներ են ծագել այնպիսի ծանրքաշայինների մոտ, ինչպիսին են՝ Volkswagen-ը եւ Deutsche Bank-ը:
Այժմ երկիր է եկել բռնությունը. մի քանի օրվա ընթացքում հրեշավոր հարձակումների հերթագայությունը ցնցել է ազգին, որն առանց այն էլ հենման կետը կորցնելու սահմանին էր: Ինչ-որ լավ բանն ավարտվել է, եւ հայտնի չէ՝ ինչ կլինի հետո, եզրափակում է հեղինակը: