Արցախում հունիսի 24-ին ծանր վիրավորված Ալբերտ Դալլաքյանը տեղափոխվել է հիվանդասենյակ: Այս մասին NEWS.am-ի թղթակցին ասաց զինծառայողի հայրը՝ Արարատ Դալլաքյանը:
«Գիտակցություն ունի, խոսում է արդեն, վիճակն էլ փառք Աստծո կայունացել է եւ դեպի լավն է գնում: Երեկվանից էլ սկսել է քիչ- քիչ քայլել»,- ասաց Արարատ Դալլաքյանը:
Նշենք, որ զինծառայողն ավելի քան 3 շաբաթ գտնվում էր ծայրահեղ ծանր վիճակում:
Հիշեցնենք, որ 20-ամյա Ալբերտ Դալլաքյանը վիրավորվել է Արցախում: Ըստ հարազատների՝ սպան անզգուշություն է ցուցաբերել, զենքը մաքրելիս մատը կպել է, կրակել եւ վիրավորել է Ալբերտին:
Ալբերտ Դալլաքյանը բռնցքամարտիկ է, ՌԴ-ից մեկ տարի առաջ եկել էր՝ հատուկ Արցախում ծառայելու համար:
