ՀՀ առողջապահության նախարար Արմեն Մուրադյանի հրամանով ստեղծվել է մասնագիտական հանձնաժողով փոխնախարար Սերգեյ Խաչատրյանի ղեկավարությամբ` ծննդկանի մահվան դեպքի կապակցությամբ։
Առողջապահության նախարարությունից NEWS.am-ին հայտնում են, որ կինը հուլիսի 26-ին «Սլավմեդ» բժշկական կենտրոնում կեսարյան հատումով երեխա է ունեցել, այնուհետեւ բարդացած վիճակում տեղափոխվել «Արմենիա» հանրապետական բժշկական կենտրոնի վերակենդանացման եւ ինտենսիվ թերապիայի բաժանմունք, որտեղ ժամեր անց արձանագրվել է կենսաբանական մահ։
Նախարարի կողմից տրվել են խիստ հանձնարարականներ մանրամասն եւ հանգամանալից ուսումնասիրելու դեպքի հետ կապված բժշկական օգնության կազմակերպման գործընթացը։
Նշանակվել է դատաբժշկական փորձաքննություն, ինչի ավարտից հետո միայն հնարավոր կլինի գնահատել մահվան պատճառահետեւանքային կապը։
Ավելի վաղ NEWS.am-ը հայտնել էր, որ Երեւանում 28-ամյա ծննդկան է մահացել: Հուլիսի 26-ին» Սլավմեդ» բժշկական կենտրոնում կեսարյան հատումով երեխա ունեցած կնոջ վիճակը վատացել է, նրան հաջորդ օրն առավոտյան տեղափոխել են Հանրապետական հիվանդանոցի վերակենդանացման բաժանմունք, որտեղ էլ ժամեր անց կինը մահացել է:
«Ռեանիմացիայի կարիք կար, տեղափոխեցինք բազմապրոֆիլ հիվանդանոց»,-NEWS.am-ի թղթակցին ասել է «Սլավմեդ»ԲԿ-ի ծննդատան վարիչ Վարդան Ռափյանը:
«Արմենիա» ԲԿ-ի վերակենդանացման բաժանմունքի վարիչ Սուրեն Մակարյանն էլ նշել է, որ կինը «Արմենիա» ԲԿ է տեղափոխվել ծայրահեղ ծանր վիճակում: «Ծննդկանը միացված էր արհեստական շնչառության ապարատին, անգիտակից էր, ծայրահեղ ծանր վիճակում: Մեզ մոտ տեղափոխվել է առավոտյան ժամը 09:00-ին եւ 14:30-ին մահացել է»,- ասել է նա:
Նշենք, որ կնոջ առաջին ծննդաբերությունն էր: Երեխայի վիճակը բավարար է: