«Սասնա ծռեր» խմբի անդամ Պավլիկ Մանուկյանը դեռեւս «Էրեբունի» բժշկական կենտրոնում է, նրա վիճակը գնահատվում է կայուն ծանր։ Այս մասին այսօր՝ հուլիսի 28-ին, NEWS.am-ի հետ զրույցում ասել է վերակենդանացման բաժանմունքի ղեկավար Արմեն Մուրադյանը։
Բժիշկը դժվարացավ ասել՝ դեռ որքան ժամանակ է մնալու նշված հիվանդանոցում Պավլիկ Մանուկյանը։
Մեր հարցին, թե այդ վիճակում ինչպես կարող է Պավլիկ Մանուկյանը հացադուլ հայտարարել, Արմեն Մուրադյանը նշել է․«Ես հացադուլի հայտարարության մասին ոչինչ չեմ կարող ասել։ Հիվանդը հետվիրահատական շրջանում է, իսկ մենք սովորաբար այդ շրջանում թույլ չենք տալիս հիվանդին հաց ուտել։ Իսկ թե ինչ հայտարարություն է եղել, ոչինչ չեմ կարող ասել, տեղյակ չեմ»,-ասել է Արմեն Մուրադյանը։
Ավելի վաղ առողջապահության նախարարության մամուլի ծառայությունից NEWS.am-ին հայտնել էին, թե Պավլիկ Մանուկյանն ինքնուրույն է շնչում, սակայն դեռեւս գտնվում է Վերակենդանացման բաժանմունքում, քանի որ բուժման անհրաժեշտություն կա այնտեղ:
Հիշեցնենք, ըստ ոստիկանության հաղորդագրության, Պավլիկ Մանուկյանն եւ նրա որդին ոտքերի հատվածում հրազենային վիրավորում են ստացել ՊՊԾ գնդում տեղի ունեցած փոխհրաձգության հետեւանքով։ Արամ Մանուկյանին մեղադրանք է առաջադրվել ՀՀ քրեական օրենսգրքի 219-րդ հոդվածի 3-րդ մասով եւ 235-րդ հոդվածով (Շենք շինությունների, հաղորդակցության ու տրանսպորտի միջոցների գրավում կազմակերպված խմբի կողմից եւ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը): Արամ Մանուկյանը այժմ դատապարտյալների հիվանդանոցում է։
