«Սասնա ծռեր» խմբի անդամ Հովհաննես Հարությունյանի պայմանները «Դատապարտյալների հիվանդանոց» ՔԿՀ-ում բավարար չեն: Այս մասին NEWS.am-ին ասաց Հովհաննեսի պաշտպան Արայիկ Պապիկյանը: «Հովհաննեսին պարբերաբար ցավազրկողներ են ներարկում, սակայն ցավեր ունի: Իմ տեսակցության ժամանակ էլ դեմքից զգացվում էր, որ ցավեր ունի: Սենյակի պայմանները բավարար չեն, նման սանիտարահիգիենիկ պայմաններում Հովհաննես Հարությունյանի պես հիվանդի համար չէ»,- ասաց Արայիկ Պապիկյանը: Նա նշեց, որ տեսակցության ժամանակ խավարասերներ է նկատել հիվանդասենյակում: Պապիկյանի խոսքով` որքան էլ բժիշկները բարեհամբույր լինեն եւ համապատասխան բուժօգնություն ցուցաբերեն, սենյակի պայմանները մտահոգիչ են:
ՀՀ ԱՆ Քրեակատարողական վարչության հանրային կապերի բաժնի պետ Գոռ Ղլեչյանն էլ մեզ հետ զրույցում նշեց, որ «Դատապարտյալների հիվանդանոց» ՔԿՀ-ի սենյակում, որտեղ գտնվում է Հովհաննես Հարությունյանը, մի քանի օր առաջ կատարվել են սանիտարահիգիենիկ եւ ախտահանման աշխատանքներ, ամեն ինչ վերահսկելի է եւ Հովհաննես Հարությունյանը գտվում է բժիշկների հսկողության տակ:
Նշենք, որ Հովհաննես Հարությունյանը վիրավորվել է հուլիսի 26-ին Աշոտ Պետրոսյանի հետ: Երկուսն էլ անմիջապես հիվանդանոց են տեղափոխվել, ապա նրանց մեղադրանք է առաջադրվել եւ խափանման միջոց կալանավորումն է ընտրվել: