Իսլամական քարոզիչ Ֆեթուլլահ Գյուլենի՝ Նիդեռլանդներում բնակվող կողմնակիցները Թուրքիայում պետական հեղաշրջման փորձից հետո հայտարարել են իրենց հասցեին մահվան սպառնալիքների տասնյակ դեպքերի մասին: Այս մասին գրում է ՌԻԱ Նովոստին:
Նիդեռլանդներում «Գյուլենի շարժման» («Հիզմեթ») ներկայացուցիչ Սանիե Կալկընը Reuters-ին հաղորդել է, որ նույնն է տեղի ունենում նաեւ Գերմանիայում:
Հոլանդական ոստիկանությունն առայժմ չի մեկնաբանել Գյուլենի կողմնակիցների հայտարարությունները:
«Նրանք սկսեցին այս «վհուկների որսը», որը հոլանդական թուրքերի միջեւ լարվածության առաջացման պատճառ դարձավ: Նիդեռլանդներում Էրդողանի միջամտության նախանշաններ կան, եւ դա սպառնում է իմ ազատությանն ու անվտանգությանը»,- նշել է Կալկընը:
Նա հաղորդել է, որ Գյուլենի՝ Նիդեռլանդներում բնակվող մի քանի հազար կողմնակիցներին սպառնում են ֆիզիկական հաշվեհարդարով, հրդեհումներով, վանդալիզմով: