Հուլիսի 29-ին Սարի թաղում ցուցարարներին ցրելիս կոտրել, ապա հափշտակել են NEWS.am-ի թղթակցի տեսախցիկը: Քաղաքացիական հագուստով անձինք, որոնք դուրս են եկել ոստիկանների թիկունքից եւ զինված էին ոստիկանական մահակներով, նաեւ փորձել են ուժ կիրառել NEWS.am-ի թղթակցի նկատմամբ (ֆոտոռեպորտաժ):
Ինչպես ավելի վաղ հայտնել էր NEWS.am-ը, Ազատության հրապարակից Սարի թաղ երթով գնացած ակտիվիստներին ոստիկանությունը ցրել է հատուկ միջոցների կիրառմամբ: Ցուցարարների շրջանում կային տասնյակ վիրավորներ: Տուժել են նաեւ լրագրողներ: Բազմաթիվ անձանց բերման են ենթարկել: Այս պահին էլ Սարի թաղում շարունակում են բերման ենթարկել մարդկանց, կանգնեցնում են անցնող բոլոր մեքենաները, ստուգում, նաեւ խուզարկում թաղամասի տները: