2015 թվականի նոյեմբերին Կոլումբիայի ափերի մոտ՝ ծովի հատակում հայտնաբերված իսպանական «Սան Խոսե» առագաստանավի բեկորները դուրս կբերվեն ծովի հատակից՝ ամբողջ մարդկության պատմության համար պահպանելու նպատակով: Սանտա Մարթա քաղաքում Ծովային հետազոտությունների ինստիտուտի նոր շենքի բացման արարողության ժամանակ այս մասին հայտարարել է Կոլումբիայի նախագահ Խուան Մանուել Սանտոսը:
Նրա խոսքով՝ աշխատանքները կիրականացնեն հնաբանները՝ կոլումբիական ծովային հետազոտությունների ինստիտուտի աջակցությամբ:
Ըստ ՏԱՍՍ-ի՝ նավը խորտակվել է 1708 թվականին, Կարիբյան ծովում, բրիտանական նավատորմի հետ մարտերի ժամանակ: Գիտնականների եւ փորձագետների կարծիքով՝ նավում կարող էին ոսկե եւ արծաթե մետաղադրամներ, ինչպես նաեւ զմրուխտ եւ թանկարժեք այլ իրեր լինել, որոնք նախատեսված էին իսպանական Ֆիլիպ 5-րդ թագավորի համար:
