Ստամբուլի օդանավակայան ժամանելուց հետո ոստիկանները խլել են ստամբուլահայ լրագրող Հայկո Բաղդատի անձնագիրը։
Ստամբուլի հայկական «Ակոս»-ի հետ զրույցում Diken պարբերականի սյունակագիր Հայկո Բաղդատը պատմել է, որ առանց իրեն պարզաբանում տալու օդանավակայանում ոստիկանները խլել են անձնագիրը՝ ասելով, թե մոտակա օրերին կտեղեկացվի պատճառի մասին։
Հայկո Բաղդատը շեշտել է, որ մոտ օրերս իր անձնագրի հարցով խորհրդարանում պարզաբանում են պահանջելու հայ պատգամավորներ Կարո Փայլանը եւ Սելինա Դողանը։
Նշենք, որ օրեր առաջ թուրք օգտատերերից մեկը գրել էր, թե Հայկո Բաղդատին կասկածում են Ֆեթուլլահ Գյուլենի հետ կապեր ունենալու մեջ, սակայն Հայկո Բաղդատը այդ պնդումը ծիծաղելի է համարել՝ ասելով, թե իր պես ձախակողմյան հայացքներ ունեցողն ինչ գործ ունեի Գյուլենի հետ։