Նիսում հուլիսի 14-ին տեղի ունեցած ահաբեկչության հետեւանքով սպանված հայուհու մարմինը տեղափոխել են Հայաստան: Այս մասին NEWS.am-ի հետ զրույցում ասաց Հայ եկեղեցու Նիսի հոգեւոր հովիվ Հայր Գրիգոր աբեղա Խաչատրյանը։
34-ամյա հայուհուն հուղարկավորել են Երեւանում: Նշենք, որ Հայաստանում բնակվում են նրա հարազատները, իսկ ամուսինն ու մանկահասակ երեխան Ֆրանսիայում են:
Հիշեցնենք, որ ահաբեկչության հետեւանքով երկու հայ է զոհվել: Նրանցից մեկը՝ 34-ամյա Մ. Գ.-ն Հայաստանի քաղաքացի էր, մի քանի տարի առաջ էր տեղափոխվել Ֆրանսիա, ամուսնացած էր, մանկահասակ երեխա ուներ: Մյուսը Ռոման Եկմալյանն էր, Վրաստանի քաղաքացի, որը Նիս էր մեկնել՝ հանգստանալու նպատակով:
Ավելի վաղ հայտնել էինք, որ 2016թ. հուլիսի 14-ի երեկոյան բեռնատարի վարորդը մխրճվել էր մարդկանց բազմության մեջ, որոնք հավաքվել էին Նիսի Անգլիական ափին՝ Բաստիլի գրավման օրվան նվիրված հրավառությունը դիտելու։ Ականատեսների վկայությամբ՝ բեռնատարը, 2 կմ զիգզագաձեւ ընթացքով անցնելով, ճզմել է մարդկանց։ Վարորդը սպանվել էր ոստիկանական ուժերի կողմից։
Պաշտոնական տեղեկություններով՝ հարձակման հետեւանքով 84 մարդ է զոհվել, այդ թվում՝ 10 երեխա: