Պիզայի Սուրբ Աննայի համալսարանի գիտնականներն ութոտնուկ-ռոբոտի փորձնական տարբերակ են ներկայացրել: Այն ստեղծվել է գիտահետազոտական ծրագրի շրջանակում, որը մեկնարկել է 2009 թվականին: Այս մասին գրում է Vistanews-ը:
Այս տարեսկզբին Միջերկրական ծովում ռոբոտն առաջին փորձարկումն է անցել: Նմուշը 4 փափուկ եւ առաձգական շոշափուկներ ունի, որոնք սարքին օգնում են լողալ, տեղաշարժվել ծովի հատակով:
Գիտնականները խոստովանում են, որ նախապես ցանկացել են ավելի բարձր տեխնոլոգիական վերջույթներ ստեղծել: Ներկայացված նմուշը սովորական սիլիկոնե վերջույթներ ունի, որոնց ներսում ճոպան է տեղադրված: Հետազոտողների խոսքով՝ թեեւ ութոտնուկ-ռոբոտը միայն փորձնական նմուշ է, ընդհանուր առմամբ, այն խթան կհանդիսանա փափուկ ռոբոտեխնիկայի զարգացման համար:
