Բանակում տիրող մթնոլորտը շատ վտանգավոր է Հայաստանի համար՝ հաշվի առնելով Ադրբեջանի կողմից հնարավոր ագրեսիայի գործոնը: Այդ մասին հոկտեմբերի 12-ին կայացած մամուլի ասուլիսում հայտարարել է Հայ ազգային կոնգրեսի համակարգող Լեւոն Զուրաբյանը՝ հավելելով, որ «երբ բանակի գեներալները շրջում են 100 հազար դոլարանոց ջիփերով, զբաղվում են կաշառակերությամբ եւ սեփական հարստացմամբ, բանակը չի կարող առողջ լինել»:
Նրա խոսքով, վերջին շրջանում բանակում կատարվող իրադարձությունները վկայում են նրա ապականման մասին: Զուրաբյանը նշել է, թե բանակի վրա ազդում է նաեւ երկրի տնտեսական վիճակը: «Երկրում սոցիալ-տնտեսական ճգնաժամի հիմնական պատճառը կոռուպցիան է: Ըստ էության, Հայաստանում տեղի է ունեցել հետեւյալը. իշխանությունն ուղղակի զավթված է ավազակախմբի կողմից եւ օգտագործվում է իշխանահպատակների հարստացման համար: Եթե վերլուծենք կենտրոնական բանկի որոշումները, պարզ է դառնում, որ տնտեսական խթանման տրամաբանություն չկա: Այս պահին, արտահանումը չորս անգամ փոքր է, քան ներմուծումը, եւ այդ վիճակում իշխանությունները շարունակում են դրամի արհեստական ամրապնդումը: Դա նշանակում է, որ կառավարությունում կամ ապուշներ են՝ առանց նվազագույն գիտելիքների, կամ նրանք բավականաչափ խելոք են եւ օգտագործում են իրենց գիտելիքները միայն ներմուծող օլիգարխների հարստացման համար»,- պարզաբանել է Զուրաբյանը: Ըստ Զուրաբյանի` ամենավառ օրինակը Գագիկ Խաչատրյանն է՝ պետեկամուտների կոմիտեի նախագահը: