Սիլիկյան թաղամասի 6-րդ փողոցի տներից մեկի տանիքում օգոստոսի 6-ին տեղի ունեցած հրդեհի հետեւանքով տանիքը կորցրած Գեւորգյանները գումար չունեն այն վերանորոգելու համար:
Գեւորգյանները, որոնց պնդմամբ հրդեհը էլեկտրաէնեգիայի պարբերաբար անջատումների հետեւանքով է բռնկվել, դիմել են քաղաքապետարան՝ օգնություն ստանալու համար, սակայն ապարդյուն:
«Հրդեհից հետո 5 ավտո զիբիլ ենք թափել, ոչինչ չի մնացել, մնացել ենք առանց տանիք: Հրդեհը մարելու համար 17 տոննա ջուր են լցրել տան վրա, ոչ էլ գույք է մնացել, տան եղած-չեղածը փչացել է: Քաղաքապետարանում ինչ-որ համար են տվել, որին զանգում ենք, չենք կարողանում կապնվել հետները: Երկու-երեք անգամ արդեն գնացել, խնդրել եմ, ոչինչ չեն անում»,- NEWS.am-ի հետ զրույցում ասաց Տարոն Գեւորգյանը:
Տարոն Գեւորգյանն ապրում է կնոջ, եղբոր ու թոշակառու մոր հետ: Ինքն ու եղբայրն աշխատում են, սակայն ստացած գումարը բավականացնում է միայն օրվա ապրուստի ու այլ ծախսերի համար: Տանիքը վերանորոգելու համար անհրաժեշտ գումարը, եղբայրները վստահ են՝ մի քանի տարում հազիվ կարողանան կուտակել:
«4000 դրամով բանվորություն ենք անում, տանիք կառուցելու համար 3 միլիոնից ավելի գումար է պետք, հայտնվել ենք անորոշ վիճակում: Շուտով անձրեւներ էլ կսկսեն ու եթե մինչեւ հիմա առանց տանիքի էինք, կմնանք առանց տուն»,- ասաց Տարոնը:
Հիշեցնենք, որ բնակիչները բողոքում էին, որ հոսանքալարերի մաշվածության հետեւանքով հաճախակի դարձած անջատումներից գրեթե բոլորն են տուժել՝ տեխնիկան է վնասվել, տան գույքը եւ այլն: Նրանց խոսքով, հոսանքն անջատվում է անգամ ուժեղ անձրեւից եւ ձյունից: Գեւորգյանները տան տանիքում բռկված հրդեհի պատճառը նույնպես էլեկտրաէներգիայի պարբերաբար անջատումներն են համարում: