«Սասնա ծռերի» գործով շուրջ 60 անձի մեղադրանք է առաջադրվել: Այս մասին հայտնում են NEWS.am-ի աղբյուրները:
Մեր տեղեկություններով՝ 47-ն այն անձինք են, որոնք կամ հուլիսի 17-ին մտել են ոստիկանության պարեկա- պահակային գնդի տարածք, կամ մեղադրվում են գնդի տարածք մտած անձանց օժանդակելու մեջ: Բացի դրանից, այս գործին միացվել է նաեւ Ժիրայր Սեֆիլյանի դեմ ամիսներ առաջ հարուցված քրեական գործը, որի շրջանակում կա 9 մեղադրյալ: «Սասնա ծռեր» խմբին միացվել է նաեւ անցած տարվա ձմռանը «Հիմնադիր խորհրդարանի» 5 անդամների դեմ հարուցված քրեական գործը, երբ մեղադրանք էր առաջադրվել Ժիրայր Սեֆիլյանին, Պավլիկ Մանուկյանին, Վարուժան Ավետիսյանին, Գեւորգ Սաֆարյանին ու Գարեգին Չուգասզյանին:
Սարի թաղում եւ Խորենացի փողոցում տեղի ունեցած բախումների գործով էլ կա շուրջ 27 մեղադրյալ: Նրանք մեղադրվում են զանգվածային անկարգություններ կազմակերպելու կամ մասնակցելու մեջ:
Նշենք, որ Հատուկ քննչական ծառայությունում սույն քրեական գործերով քննություն անցկացնելու համար քննչական խումբ է ձեւավորվել: Մեր տեղեկություններով, քննիչների թիվը մի քանի տասնյակի է հասնում:
