«Հիմնադիր խորհրդարանի» անդամ Ժիրայր Սեֆիլյանի դեմ հարուցված քրեական գործը միացվել է «Սասնա ծռերի» գործին, սակայն մեղադրանքի մեջ որեւէ նոր դրվագ չկա: Այս մասին NEWS.am-ին ասաց Սեֆիլյանի պաշտպան Տիգրան Հայրապետյանը:
Փաստաբանը հիշեցրեց, որ դեռեւս 2015թ. փետրվարին քրեական գործ էր հարուցվել Քրեական օրենսգրքի 35-225-րդ հոդվածի հատկանիշներով, այն է՝ զանգվածային անկարգություններ կազմակերպելը: Սույն քրեական գործով մեղադրանք էր առաջադրվել «Հիմնադիր խորհրդարանի» միանգամից հինգ անդամի՝ Գեւորգ Սաֆարյան, Ժիրայր Սեֆիլյան, Գարեգին Չուգասզյան, Պավլիկ Մանուկյան եւ Վարուժան Ավետիսյան:
«Մեղադրանքի հիմքում հետեւյալն էր. 2014թ.-ից սկսած «Հիմնադիր խորհրդարանի» անդամներն իրենց հրապարակային ելույթներով, հրավիրած ասուլիսներով, կազմակերպված հավաքներով ու ցույցերով առիթը բաց չեն թողել, որ ժողովրդի մեջ բացահայտեն իշխանությունների թերություններն ու համաժողովրդական ընդվզման նպատակ են ունեցել: Փաստորեն զուտ քաղաքական մոտիվներով հարուցված քրեական գործ է, եւ մեկ նպատակ էր հետապնդում, որ ապրիլի 24-ին ազատության մեջ չլինեին նրանք, եւ Հայաստանը չներկայացվի ամբողջ աշխարհին ակնհայտ ներքաղաքական հակասություններով»,- ասաց Տիգրան Հայրապետյանը:
Մեկ այլ քրեական գործ էլ հարուցվեց այս տարվա մայիսին, որի շրջանակում մեղադրանք առաջադրվեց Ժիրայր Սեֆիլյանին եւ եւս 8 անձանց: Սեֆիլյանը մեղադրվում էր մի խումբ անձանց միջոցով զենքի ապօրինի շրջանառություն կազմակերպելու մեջ:
«Այս երկու քրեական գործը գլխավոր դատախազը որոշում է կայացրել օբյեկտիվ, լրիվ, բազմակողմանի քննություն անցկացնելու համար Քննչական կոմիտեից տեղափոխել Հատուկ քննչական ծառայություն: Տպավորություն է, որ Քննչական կոմիտեն մինչ այդ օբյեկտիվ, լրիվ եւ բազմակողմանի քննություն չէր իրականացնում: 2015թ. հարուցված քրգործը 1,5 տարի է՝ քննվում է, սակայն որեւէ ապացույց ձեռք չի բերվել զանգվածային անկարգություն նախապատրաստելու մասով: Այժմ էլ միացվել է «Սասնա ծռեր» խմբի գործին, Սեֆիլյանին մեղադրանք առաջադրվեց Քրեական օրենսգրքի 35-225-րդ եւ 38-235-րդ հոդվածներով, նոր դրվագ չկա մեղադրանքի մեջ»,- նշեց նա:
Տիգրան Հայրապետյանը հայտնեց նաեւ, որ Սեֆիլյանի մասնակցությամբ որեւէ քննչական գործողություն չի կատարվել:
