Վերաքննիչ դատարանն այսօր՝ օգոստոսի 22-ին, մերժեց «Սասնա խռեր» խմբի անդամ Արեգ Կյուրեղյանի խափանման միջոց կալանքը վերացնելու մասին միջնորդությունը: Այս մասին նիստից հետո լրագրողներին ասաց նրա փաստաբան Մուշեղ Շուշանյանը:
Ըստ փաստաբանի՝ դատարանը բողոքը քննել է առանց իր ներկայության:
Նշենք, որ այսօր առավոտյան Մուշեղ Շուշանյանը լքել էր նիստերի դահլիճը, քանի որ Արեգ Կյուրեղյանը ցանկացել էր ներկա գտնվել բողոքի քննությանը, սակայն դատարանը դրա վերաբերյալ իր միջնորդության քննարկումը հետաձգել էր:
Արեգ Կյուրեղյանը մեղադրվում է Քրեական օրենսգրքի 218-րդ (պատանդ պահել) եւ 235-րդ հոդվածներով (զենք, զինամթերք կրել, փոխադրել): Նա կալանավորված է: