Pokemon Go խաղի ապշեցուցիչ հաջողությունից հետո մշակողների մեծ մասը սկսել են մտածել, թե լրացուցիչ իրականության տեխնոլոգիայի գործածումով ուրիշ ինչ հավելված կարելի է առաջարկել օգտատերերին, հայտնում է Informing–ը:
Տիբա պրեֆեկտուրայի ծիսակարգային բյուրոյի մասնագետները առանց երկար –բարակ մտածելու՝ ստեղծել են Spot message ծրագիրը, որը թույլ է տալիս «որսալ» մահացածների ուղերձները:
Կենդանության օրոք ուղարկված հաղորդագրությունները ստանալու համար անհրաժեշտ է գտնել մահացած մարդու գերեզմանը կամ այդ մարդու համար կարեւոր նշանակություն ունեցող որեւէ այլ վայր, ձեզ հետ տանելով ձեր սմարթֆոնը: Նաեւ օգտատերերը կարող են իրենց հարազատների ու ընկերների համար մեդիաֆայլերի հավաքածու ստեղծել, որը հնարավոր կլինի տեսնել նրանց մահից հետո:
Ձայնագրված կերպարները հայտնվում են իրական բնապատկերների ֆոնին, երբ միացնում ես տեսախցիկը:
Հավելվածը ստեղծած ընկերության նախագահ Եսիյուկի Կատորիի խոսքով ինքը որոշել է իրագործել իր վաղեմի երազանքը՝ մահացածների մասին հիշողություն պահպանելու միջոց գտնելը:
Կատորին պատմել է, որ իր հորեղբոր անսպասելի մահից հետո ինքը հաճախ էր գնում նրա գերեզման, մտովի զրուցում նրա հետ ու մտածում, որ լավ կլիներ, եթե կարողանար նրանից հաղորդագրություններ ստանալ:
Նշենք, որ այս հավելվածը կարելի է օգտագործել նաեւ այլ՝ ավելի սովորական նպատակների համար: Օրինակ դրա օգնությամբ կարելի է սիրելի մարդկանց համար հաղորդագրություն թողնել հիշարժան վայրերում,շնորհավորել տոների կամ տարեդարձների կազմակերպությամբ եւ այլն:
Հիմա հավելվածը կարելի է անվճար ներբեռնել Android–ի վրա, ստանալով 10 անվճար հաղորդագրություն ստեղծելու հնարավորություն: iOS-ի համար տարբերակը կհայտնվի արդեն սեպտեմբերին:
