Կոտայքի մարզում օգոստոսի 21-ին տեղի ունեցած ողբերգական դեպքով ՀՀ քննչական կոմիտեում քրեական գործ է հարուցվել 242-րդ հոդվածի 2-րդ մասի՝ ճանապարհային երթեւեկության եւ տրանսպորտային միջոցների շահագործման կանոնները խախտելու հատկանիշներով։ Այս մասին NEWS.am-ին հայտնեցին ՀՀ քննչական կոմիտեի մամուլի ծառայությունից։
Հիշեցնենք, որ ժամը 20։00-ի սահմանում Չարենցավանի բժշկական կենտրոնում ահազանգ էր եղել, որ Երեւան-Սեւան ավտոճանապարհի 31-րդ կմ հատվածում Samand մակնիշի 26 UL 143 համարանիշի ավտոմեքենայի վարորդի ինքնազգացողությունը վատացել է։ Վարորդը մահացել էր ճանապարհին, շտապօգնության մեքենայում:
Պարզվել է, որ հիվանդանոց տեղափոխելու ժամանակ շտապօգնության ավտոմեքենայի մեջ է եղել նաեւ մահացածի դուստրը, որը, տեսնելով, որ հայրը մահացել է, բացել է մեքենայի դուռը եւ իրեն դուրս է նետել: Նա նույնպես տեղում մահացել է։
Չարենցավանի բժշկական կենտրոնից NEWS.am-ին հայտնեցին, որ տղամարդը, նախնական տվյալով, ունեցած սրտի խնդիրներից է մահացել։ Բժշկական կենտրոնից հայտնեցին նաեւ, որ «Շտապօգնության» մեքենայի մեջ են եղել նաեւ տղամարդու կինն ու դուստրը, երբ մյուսները ռեանիմացիոն գործողություններով են զբաղված եղան, աղջիկն իրեն դուրս է նետել։