Արցախա-ադրբեջանական սահմանին տեղի ունեցած քառօրյա պատերազմի ժամանակ հակառակորդի հետ մարտնչելիս զոհված ԻԱՎ հրամանատար, կապիտան Հովսեփ Կիրակոսյանն այսօր՝ օգոստոսի 23-ին, կդառնար 29 տարեկան: Հովսեփը Արմավիրի մարզի Ապագա գյուղի բնակիչ էր. կնոջ եւ երկու անչափահաս երեխաների հետ բնակվում էր Արցախում:
Նա ապրիլի 1-ի լույս 2-ի գիշերը, հակառակորդի հարձակման պահին, եղել է տանը.կնոջը միայն հասցրել է ասել` երեխաներին վերցրու եւ նկուղում թաքնվեք, իսկ ինքն այդ ճակատագրական պահին մենակ թողնելով իր կնոջն ու զավակներին` օգնության է շտապել իր 25 զինվորներին:
Հովսեփը վստահ է եղել, որ իր կինն ուժեղ է եւ կկարողանա փրկել երեխաների կյանքը` ասել է ուժեղ ես եւ կարող ես այդ իրավիճակում ճիշտ որոշում կայացնել:
Հովսեփ Կիրակոսյանը զինված ուժերում ծառայում էր 2006թ.-ից: Նա դպրոցն ավարտելուց հետո սովորել է ՀՀ ՊՆ Վազգեն Սարգսյանի անվան ռազմական ինստիտուտում, այնուհետեւ մեկնել Մարտակերտ` ծառայության:
