Հայաստանի ԱԳՆ-ում օգոստոսի 22-ին կայացել է առեւտրատնտեսական հարցերով հայ-չինական համատեղ հանձնաժողովի 9-րդ նիստը, որը նախագահում էին ՀՀ ԱԳ նախարարի տեղակալ Ռոբերտ Հարությունյանը եւ ՉԺՀ կոմերցիայի նախարարի տեղակալ Ծյան Քըմինը։
ԱԳՆ-ից NEWS.am-ին հայտնում են, որ նիստի ընթացքում հանգամանալից քննարկվեց ՀՀ եւ ՉԺՀ միջեւ գյուղատնտեսության, երկկողմ առեւտրի, առողջապահության, արդյունաբերության, ավիացիայի, զբոսաշրջության, ճանապարհաշինության, ենթակառուցվածքների, նորարարական տեխնոլոգիաների եւ այլ ոլորտներում համագործակցության հարցերի լայն շրջանակ։ Կողմերն ամփոփեցին վերջին տարիներին ձեռքբերված համաձայնությունների եւ ընդունված որոշումների շրջանակներում երկկողմ համագործակցության եւ առեւտրատնտեսական հարաբերությունների զարգացման արդյունքները։
Հանդիպման ավարտին Ռոբերտ Հարությունյանը եւ Ծյան Քըմինը ստորագրեցին նիստի արձանագրությունը։ Ըստ ձեռք բերված պայմանավորվածության՝ հանձնաժողովի հաջորդ նիստը տեղի է ունենալու 2017թ. Պեկինում:
