Հայկական դրամով պարտատոմսերի նկատմամբ կորպորատիվ գնորդների պահանջարկը հասկանալի է. դա ազգային արժույթով միջոցների մնացորդը կառավարելու միջոց է: Այդ մասին NEWS.am–ի թղթակցին ասել է ֆոնդային բորսայի գլխավոր տնօրեն Կոնստանտին Սարոյանը, մեկնաբանելով մի շարք էմիտենտ- բանկերի դիտարկումներն այն մասին, որ դոլարային արժեթղթերը նրանցից հիմնականում ֆիզիկական անձինք են գնում, իսկ դրամայինը՝ մասնավոր ոլորտը:
Ընդհանուր առմամբ գերազանցում են դոլարային թողարկումները, որոնց օգնությամբ բանկերը նախեւառաջ դիվերսիֆիկացնում են ներգրավված միջոցները: Իսկ երկրորդ՝ հնարավորություն են ունենում նվազեցնել ռեզերվավորման դրույքը ( արտարժույթով ներգրավված միջոցների համար այն 20 տոկոս է կազմում: Բայց Հայաստաանի ներսում շրջանառվող պարտատոմսերի համար դրույքը նվազում է մինչեւ 10 տոկոս- խմբ.) Եվ այստեղ արժութային պարտատոմսերը լավ այլընտրանք են դառնում արժույթային դեպոզիտների համար (քանի որ Հայաստանի բնակչությունը հիմնականում ձգտում է գումարը արտարժույթով պահել):
Ինչ վերաբերում է դրամային պարտատոմսերին, ապա դրաանց օգնությամբ կարելի է ֆորվարդային պայմանագրեր կնքել (գնում ու հետագա փրկագին ֆիքսված գնով): Դա գումարային միջոցները կառավարելու լավ միջոց է ( հիմնականում հայկական դրամներով), պարզաբանեց Սարոյանը:
Նկատենք, որ ԿԲ տվյալներով, 2015-ին Կենտրոնական դեպոզիտարիումի համակարգի միջոցով գործարքների մասով արժեթղթերի շրջանառությունը աճել է 4.2 անգամ՝ հասնելով 1 տրլն. 182 մլրդ դրամի (ընթացիկ փոխարժեքով մոտ 2.48 մլրդ դոլար): Այդ համակարգում գրանցվում են ոչ միայն կորպորատիվ պարտատոմսերով գործարքները, այլեւ Հայաստանի սուվերեն եվրապարտատոմսերով արտաբորսային գործարքները: