Թավրիզում Ադրբեջանի երկու քաղաքացիներ՝ մայր ու որդի, ինքնասպանություն են գործել: Report-ի հաղորդմամբ՝ 50-ամյա Ասլի Այադդին Իբրահիմովան մահացել է քաղաքային հիվանդանոցում:
Ողջ մնացած 14-ամյա Հուսեյն Իբրահիմովը պատմել է, որ մայրը դեղատանը հաբեր է գնել եւ որդուն խորհուրդ տվել ընդունել դրանք: Ե՛վ մայրը, ե՛ւ որդին խմել են դեղերը, ինչից հետո երեխայի վիճակը վատացել է: Մայրը տղային հիվանդանոց է տարել, որտեղ ինքն էլ վատ է զգացել ու կորցրել գիտակցությունը: Երեք օր անց կինը մահացել է:
Տղայի խոսքով՝ մայրն այդ քայլին դիմել է, որպեսզի իրենց չարտաքսեն Իրանից: Նա նաեւ պատմել է, որ Ադրբեջանում ծանոթներ եւ ազգականներ չունեն:
Ասլի Իբրահիմովան Իրան է տեղափոխվել 2015 թվականի հոկտեմբերին: Դեպրեսիայի պատճառով նա հոգեմետ դեղորայք է ընդունել: Իրանում կեցության ժամկետը լրանալու եւ դեռեւս երկրում գտնվելու պատճառով կինը տուգանվել է: Հաջորդ քայլը նրանց արտաքսումը պետք է լիներ:
