Սիրիայի ու Լիբանանի հին իրերի սեւ շուկան լցվել է ԻՊ խմբավորման գրոհայինների վաճառած կեղծիքներով, առգրավված արտեֆակտների գրեթե երեք քառորդը կեղծիք է եղել: Այս մասին հայտնում է Սիրիայի հնությունների ու թանգարանների դեպարտամենտի գլխավոր տնօրեն Մաամուն Աբդուլքարիմը, հայտնում է «ՌԻԱ Նովոստին»:
Art Newspaper թերթը, վկայակոչելով Աբդուլքարիմին, գրում է, որ Սիրիայի ու Լիբանանի սեւ շուկաներում 2013-ի համեմատ կեղծ արժեքների քանակը 30 տոկոսից գրեթե 70 տոկոս է դարձել:
Դամասկոսում առգրավված իրերի մեջ եղել են Աստվածաշնչի ու Ղորանի 30 կեղծ նմուշ, 450 «միջնադարյան ոսկեդրամ», կեղծ խճանկարներ ու արձանիկներ: Աբդուլկարիմի խոսքով որոշ կեղծիքներ բնօրինակից տարբերելը շատ բարդ է: Լիբանանում առգրավել են 89 արտեֆակտ՝ 20 արձանիկ Պալմիրայից, 18 խճանկար ու մի քանի ճարտարապետական տարր:
Խոսելով Պալմիրայում վերականգնողական աշխատանքների մասին, Աբդուլքարիմը ասել է, որ արտեֆակտների մեծ մասը լավ է պահպանվել ու հավելել, որ բարեբախտաբար Պալմիրայիի «արվեստը կորած չէ»: Նրա խոսքով Պալմիրայում աշխատանքները ավարտին հասցնելու համար հինգ տարի է պետք: Հիմա վերականգնում են Բաալշամինի ու Բելի երկու տաճարները:
Պալմիրայի հին ավերակները Սիրիայում ՅՈՒՆԵՍԿՕ-ի համաշխարհային ժառանգության վեց օբյեկտներից մեկն է: Այն 2015-ի մայիսից գտնվում էր ԻՊ գրոհայինների վերահսկողության տակ: Զինյալները մեծ վնաս էին հասցրել պատմական քաղաքին, պայթեցրել տաճարները, կողոպտել դամբարաններն ու թանգարանը: