Մեծ թվով քաղաքացիներ այսօր՝ օգոստոսի 29-ին, հավաքվել են Վերաքննիչ քրեական դատարանի առջեւ, որտեղ քննվում է Ժիրայր Սեֆիլյանի կալանավորման երկարացման վերաքննիչ բողոքը։
NEWS.am-ի թղթակիցը հաղորդում է, որ հավաքված քաղաքացիները եկել են «Հիմնադիր խորհրդարանի» առաջնորդի լուսանկարով պաստառներով եւ վանկարկում են «Ազատություն Ժիրոյին»: Կարգադրիչները փակել են դատարանի դուռը, ինչի պատճառով հավաքվածները բողոքի ակցիան անում են նախասրահում:
Այս պահին հայտնի չէ՝ Սեֆիլյանը դատարանում է, թե ոչ:
Հիշեցնենք, որ այս տարվա մայիսին քրեական գործ էր հարուցվել, որի շրջանակում մեղադրանք էր առաջադրվել Ժիրայր Սեֆիլյանին եւ եւս 8 անձանց: Սեֆիլյանը մեղադրվում էր մի խումբ անձանց միջոցով զենքի ապօրինի շրջանառություն կազմակերպելու մեջ: Օգոստոսի սկզբին Սեֆիլյանի գործը միացվել էր «Սասնա ծռեր»-ի գործին: Նրան այժմ մեղադրանք է առաջադրվել Քրեական օրենսգրքի 35-225-րդ եւ 38-235-րդ հոդվածներով:
