Ինդոնեզիայում 17-ամյա անչափահասը, որը «Իսլամական պետության» համակիր է, հարձակվել է կաթոլիկ հոգեւորականի վրա: Միջադեպը տեղի է ունեցել Սումաթրա կղզում կաթոլիկ եկեղեցում ընթացող պատարագի ժամանակ, փոխանցում է AFP-ն:
Պայթուցիկ ինքնաշեն սարքը կրծքավանդակին կապած՝ նա ներխուժել է եկեղեցի եւ դանակով հարձակվել հոգեւորականի վրա: Նա փորձել է գործարկել պայթուցիկը, բայց նրան դա չի հաջողվել: Հոգեւորկանը ձեռքի թեթեւ վնասվածք է ստացել, քանի որ անցորդներին հաջողվել է հարձակվողին ժամանակին կանգնեցնել:
Ոստիկանության տվյալներով՝ անչափահասը ԻՊ առաջնորդի համակիրն է, նրա ուսապայուսակին գրված էր. «Ես սիրում եմ Աբու Բաքր ալ-Բաղդադիին»: Նրա տանը հայտնաբերվել են մալուխ, վառոդ եւ խողովակներ, որոնցով պատանի իսլամիստը փորձել է ռումբ պատրաստել: Դրա հետ մեկտեղ, ոստիկանները չեն կարծում, որ անչափահասը ԻՊ անդամ էր: