Այս տարվա ընթացքում ճանապարհատրանսպորտային պատահարների հետեւանքով զոհվել է 150 եւ վիրավորվել 2794 քաղաքացի։ Այս մասին այսօր՝ օգոստոսի 30-ին, լրագրողների հետ զրույցում հայտնել է Ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը։
«ՀՀ-ում այսօրվա դրությամբ ունենք կայուն վթարայնության վիճակ, վիճակը կարելի է գնահատել բավարար, քանի որ վերջին հինգ տարիներին տարեցտարի աճող տենդենցի պայմաններում այսօր պատահարների քանակի պատկերը փոխվել է ու դրանց հետեւանքով նվազել տուժած քաղաքացիների թիվը։ Օգոստոսի 29-ի դրությամբ ՀՀ-ում գրանցվել է 1972 ճանապարհատրանսպորտային պատահար, որի հետեւանքով զոհվել է 150 եւ վիրավորվել 2794 մարդ։ Նախորդ տարվա նույն ժամանակաշրջանի համեմատությամբ պատահարների քանակը նվազել է 174-ով, զոհերի թիվը 53-ով եւ վիրավորների թիվը 253-ով։ Այս երեք ցուցանիշները վթարայնության վիճակը բնութագրող ամենահիմնական պարամետրերն են, որոնցով կարելի գնահատական տալ, թե ինչպիսին է երկրում վթարայնության վիճակը։ 2011-ից սկսած աճի տենդենց կար եւ առաջին անգամ այս տարի այդ աճի տենդեցը կանգնել է»,-ասել է Նորիկ Սարգսյանը։
Ըստ նրա՝ պատահարները նվազել են երկու գործոնով՝ վարորդների նկատմամբ խիստ վարչարարությամբ եւ թաղանթապատված դիմապակիների դեմ պայքարով։
