Ղազախստանում օգոստոսի 12-ից 30-ին կասեցվել է երեք արմատական խմբավորման գործունեությունը, որոնք երկրի տարածքում ահաբեկչական գործողություններ էին պլանավորել: Այդ մասին հայտնում է Ազգային անվտանգության կոմիտեի (ԱԱԿ) կայքը:
«Ազգային անվտանգության կոմիտեն հայտնում է օգոստոսի 12-ից 30-ն ընկած ժամանակահատվածում Արեւմտաղազախական եւ Ակտյուբինյան մարզերի տարածքում արմատական երեք խմբավորման գործունեությունը կասեցնելու մասին: Արդյունքում խափանվել են արմատականների` իրավապահ մարմինների աշխատակիցների վրա հարձակում կատարելու, ինչպես նաեւ զանգվածային կուտակման վայրերում ահաբեկչական գործողություններ իրականացնելու մտադրությունները», — ասված է հաղորդագրության մեջ:
Խուզարկության ընթացքում առգրավվել է հրազեն եւ զինամթերք, ինքնաշեն պայթուցիկ սարք, դանակներ, ծայրահեղական բովանդակությամբ տպագիր եւ աուդիոնյութեր, միջազգային ահաբեկչական կազմակերպությունների ատրիբուտիկա:
Ներկայումս խմբավորման անդամների նկատմամբ նախաքննություն է սկսվել:
