ԼՂՀ-ում առաջարկվող նախագահական համակարգը առավելագույնս մոտ է բացարձակ ժողովրդավարության գաղափարին: Այս մասին օգոստոսի 31-ին մամուլի ասուլիսի ժամանակ ասել է «Ազգային ինքնորոշում» միավորման առաջնորդ Պարույր Հայրիկյանը:
Նրա խոսքով, այսօր ինքը կհանդիպի ԼՂՀ նախագահ Բակո Սահակյանի հետ ու կքննարկի սահմանադրական փոփոխությունները:
«Զարմանալի է, որ Լեռնային Ղարաբաղը գնում է մի ուղով, որը տարբերվում է Հայաստանից: Դա կառավարման նախագահական ձեւի ներդրումն է, մենք այն անվանում ենք «վարչապետական», քանի որ ժողովուրդն ունենալու է ընտրված վարչապետ ու նախագահ, նաեւ ուժեղ խորհրդարան: Հավատում եմ, որ մեր այցը կնպաստի կարեւոր գաղափարի ներդրմանը՝ ավելի կարեւոր, քան նույնիսկ Լեռնային Ղարաբաղի ժողովրդի ինքնորոշման գաղափարը»- ասել է Պարույր Հայրիկյանը: Նրա համոզմունքով դա ղարաբաղյան կարգավորման հարցում ավելի լուրջ ավանդ է լինելու, քան նույնիսկ ամենահզոր սպառազինումների մատակարարումը: «Հույս ունեմ, որ Ղարաբաղում կհասկանան այս խնդրի կարեւորությոնը, ու մեկ տարի հետո աշխարհի քարտեզում ԼՂՀ –ն նշված կլինի որպես միակ բացարձակ ժողովրդավարական երկիր»,- ամփոփել է Հայրիկյանը:
Հիշեցնենք, որ ԼՂՀ նոր սահմանադրության հայեցակարգը ենթադրում է անցում կառավարման նախագահական ձեւին: Հայեցակարգի համաձայն՝ հանրապետության նախագահը կստանձնի նաեւ վարչապետի լիազորությունները: Ըստ հայեցակարգի՝ նախագահը նշանակելու ու պաշտոնից ազատելու է նախարարներին, օրենսդրական վետոյի իրավունք է ունենալու, որը կարող է հաղթահարվել միայն ԱԺ պատգամավորների ձայների մեծամասնությամբ: Նաեւ ըստ հայեցակարգի առաջարկում են նախագահական ու խորհրդարանական ընտրությունները միաժամանակ անցկացնել:
