ՊՆ N զորամասի ավտոհավաքակայանում ապրիլի 11-ին ժամկետային զինծառայող Գառնիկ Ավետիսյանին մահացու վրաերթի ենթարկելու գործով նախաքննությունն ավարտվել է եւ գործն ուղարկվել դատարան: Այս մասին տեղեկանում ենք Դատական տեղեկատվական համակարգից:
Ըստ մեղադրական եզրակացության՝ ժամկետային զինծառայող Հայկ Հարությունյանն ապրիլի 11-ին ժամը 15:35-ի սահմաններում, Զիլ-131 մակնիշի ավտոմեքենայի անվադողերը լիցքավորելու նպատակով իրեն ամրակցված «Ուրալ 4320» մակնիշի մեքենայով ծածկարան մուտք գործելիս մահացու վրաերթի է ենթարկել ավտոմեքենայի առջեւ կանգնած Գառնիկ Ավետիսյանին:
Հայկ Հարությունյանին մեղադրանք է առաջադրվել Քրեական օրենսգրքի 377-րդ հոդվածի 2-րդ մասով, որը նախատեսում է ազատազրկում՝ առավելագույնը 5 տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը 3 տարի ժամկետով կամ առանց դրա: Խափանման միջոց է ընտրվել ստորագրություն չհեռանալու մասին:
Ավելի վաղ հայտնել էինք, որ 2016թ. ապրիլի 11-ին ժամը 16:00-ի սահմաններում «Ուրալ-4320» մակնիշի N զինհամարանիշի մեքենայով քարշակելիս՝ մարտական մեքենաներ վարելու կամ շահագործելու կանոնների խախտման հետեւանքով պարտադիր ժամկետային զինծառայող, շարքային Գառնիկ Ավետիսյանը մնացել է քարշակող եւ քարշակվող «ԶԻԼ-131» մակնիշի N զինհամարանիշի մեքենաների արանքում, որից քիչ անց՝ Դիլիջանի բժշկական կենտրոն տեղափոխվելու ճանապարհին, մահացել է: Հարուցվել է քրեական գործ: